Korrik 2010

Kros për Amaro Tan

Në 17 korrik 2010 më shumë se 70 vrapues garuan për një qëllim të mirë: sponsorat e tyre kontribuan me një total prej 220.000 lekësh (rreth 1.650 Euro) për shkollën Amaro Tan. Një shumëllojshmëri vrapuesish zunë vendet e tyre ne vijën e nisjes: që nga drejtorët e shkollave dhe bashkëpunëtorë e deri tek femijët e vegjël. Edhe nxënësi i Amaro Tan-it, Xhulio, i cili vuan nga një sëmundje (amiotropia) që e mban të gozhduar në karrocë me rrota, nuk i rezistoi dot kënaqësisë së vrapimit. Miq nga jashtë vendit, mësues, nxënës, studentë, një grup i madh sponsorash dhe ndihmuesish të palodhur bënë qe ky aktivitet të ishte i paharrueshëm. Grupi i parë i Universitetit NEHEMIA ishte përgjegjës për gjithë organizimin e aktivitetit dhe ja dolën më së miri që të vënë në praktikë çfarë kanë mësuar deri tani në teori. Edhe pse shpejtësia nuk ishte kriter fitues, disa nga vrapuesit e vegjël e përfunduan gjithë garën për 10 minuta. Aktiviteti u kurorëzua me dorëzimin e çekut drejtorit të shkollës Dëfrim Hoxha, por edhe me muzikën e pazëvendësueshme rome nga shkolla Amaro Tan. Falenderojmë të gjithë pjesëmarrësit në garë, organizatorët e kompanisë “cip” nga Gjermania, shumë donatorë nga Gjermania, Zvicra dhe Hollanda dhe sponsorat nga Pogradeci. Dhe atë që ishte përgjegjës për motin: Një falenderim special!

Korrik 2010

Inagurimi i dy ndërtesave në fshatin Peshkëpi

Më 28 qershor 2010 në fshatin Peshkëpi u inaguruan dy ndërtesa të reja: Shtëpia e Misionit dhe Qendra Komunitare. NEHEMIA në bashkëpunim me organizatën partnere “Misioni i Kryqit të Artë” ka vite që shërben në fshatin Peshkëpi me disa projekte në kuadër të zhvillimit të komuniteti, projekt ky i nisur nga i ndjeri Alfred Wenig, themeluesi i “Misionit të Kryqit të Artë”. Në këtë aktivitet ishin të pranishëm përfaqësues të Komunës Buçimas, të Fondacionit NEHEMIA dhe “Misionit të Kryqit të Artë”, të cilët festuan sëbashku me gjithë komunitetin e fshatit dhe bashkëpunëtorët e NEHEMIA-s. Të dyja këto ndërtesa ishin në gjendje të mjerueshme dhe të papërdorshme. Tani ato janë shumë të bukura, funksionale dhe me standarte të larta, duke i dhënë një prespektive tjetër këtij fshati. Qendra komunitare ofron ambiente që përdoren për aktivitet sociale dhe kulturore dhe gjithashtu mensa e NEHEMIA-s për të varfërit. Shtëpia e Misionit shërben si vend për „arratisje“ nga monotonia dhe zhurma, mund të shijosh ajrin e pastër, pejsazhe marramendëse dhe një mikpritje të ngrohtë nga njerëzit.

Qershor 2010

Kampe verore

Si çdo vit edhe këtë vit bashkësia NEHEMIA në Buçimas, organizon kampe verore për fëmijë. Kampi i parë sapo ka përfunduar dhe në të kanë marrë pjesë 27 fëmijë të moshave 4-8 vjeç. Kampet që zhvillohen kanë gjithmonë një temë të veçantë dhe këtë vit tema e kampit ishte „Fëmijët e Biblës“. Qëllimi i këtij kampi ishte që fëmijët të merrnin shëmbuj nga Bibla dhe ti adoptonin në jetën e tyre, por gjithashtu ka pasur edhe lojëra, mësim, adhurim, punëdore, konkurse e shumë aktivitete të tjera. Në fund të kampit të gjithë fëmijët shprehën dëshirën e tyre të madhe për të marrë pjesë përsëri në një kamp të tillë vitin që vjen. Kampe të tjera janë në vazhdimësi per tu organizuar dhe një nga këto është kampi Royal Rangers i cili është i ndërthurur edhe më një kamp NTC në të njëjtën kohë. Kampet verore janë një pjesë shumë e rëndësishme dhe aktive në punën frymërore që NEHEMIA kryen me fëmijët dhe të rinjtë e Pogradecit dhe fshatrave përreth si dhe në Qendrat Lokale Durrës, Gjirokastër dhe Has.

Maj 2010

adidas-NEHEMIA Challenge Cup 2010

Në periudhën prill-maj 2010, u zhvillua faza e gjysëm finaleve për kampionatin “adidas-NEHEMIA Challenge Cup” 2010 në rrethin e Pogradecit. 33 shkolla të sistemit 9-vjeçar me 124 skuadra morën pjesë në tre disiplinat sportive: minifutboll, basketboll dhe volejboll për djem dhe vajza. Shkollat janë duke përfunduar edhe projektet e tyre në ndihmë të komunitetit si kusht kualifikimi në fazën finale. Faza finale do të zhvillohet në datën 9-10 tetor 2010 në kuadër të tetorit Gjerman. Për herë të parë këtë vit skuadra fituese e kampionatit “adidas-NEHEMIA Challenge Cup” do të vlerësohet në të tre disiplinat sportive, për tu kualifikuar në finale. Data 10.10.2010 “Sports Experience Day” do të jetë një ditë kushtuar sportit, me një varietet aktivitetesh, lojërash dhe zbavitje. Miq nga cip, kompania organizatore e aktivitete të adidas, do të jenë organizatorë. Jeni të gjithë të mirëpritur!

Prill 2010

NEHEMIA prezanton

Përgjatë javës që shkoi NEHEMIA organizoi disa aktivitete publike.

Prezantimi i Raportit Vjetor 2009 hapi siparin e aktiviteteve, i cili u zhvillua në mjediset e Ambasadës Gjermane, në Tiranë. Programi përmbante informacion të mjaftueshëm si edhe pjesë të ndryshme muzikore.

Dy ditë më vonë, përgjatë datave 22-25 prill, NEHEMIA mori pjesë në Panairin që u zhvillua në Tiranë, me fokus arsimin dhe shërbimet, përkrah kompanive Gjermane, Austriake dhe Zvicerane. Informacioni u prezantua në një stendë shumë atraktive, me lojra të ndryshme dhe produkte të fshatit Peshkëpi, duke u kompletuar nga një ekspozitë me ilustrime nga piktori pogradecar, Anastas Konstandini (TASO).

Shkëmbimi i informacionit dhe interesimi i vizitorëve, kompanive dhe organizatave ishte mbreslënës përgjatë këtyre ditëve.

Një javë shumë e sukseshme dhe në të njëjtën kohë rrit aspiratat për të ardhmen.

Mars 2010

Raporti Vjetor 2009 i NEHEMIA-s është gati per tu shkarkuar

Që prej vitit 1997 Zyra e Medias NEHEMIA ka përpiluar dhe publikuar raportin vjetor mbi aktivitetet dhe financat e Fondacionit. Në këtë raport do të gjeni ngjarjet kryesore për 2009 si dhe sfidat për 2010.

Gjithashtu do të gjeni informacion mbi Visioni, Misionin dhe Strukturen si dhe një informacion të detajuar mbi Projektet e NEHEMIA-s në tre fushat kryesore: edukimi, shërbesa frymërore dhe puna sociale. Natyrisht në kete raport gjendet edhe auditimi i liçensuar i të ardhurave si dhe raporti financiar.

Klikoni këtu për të shkarkuar Raportin Vjetor 2009 në format PDF.

Shkurt 2010

“Dhuna”

“Dhuna” është një problem serioz që diskutohet shumë pak ose aspak, veçanërisht në zonat rurale te Shqipërisë. NEHEMIA nëpërmjet Projektit Social kërkon që të sensibilizojë komunitetin me anë të seminareve dhe takimeve të veçanta mbi këtë temë.

Ky seminar ishte pjesë e programit për zhvillim komuniteti në fshatin Peshkëpi, ku NEHEMIA punon prej shumë vitesh. Seminari u prezantua nga Gentiana Mançellari, infermiere e Klinikës NEHEMIA mbi formën e një bashkëbisedimi, ku elementet kryesorë u theksuan edhe në materiale të ndryshme mbi dhunën, dhe historitë jetësore të grave të dhunuara që u shpërndanë.

Për komunitetin në fshatin Peshkëpi, ky seminar ishte një diçka shumë e veçantë dhe shprehën deshirën e një vazhdimësie në organizimin e aktiviteteve të tilla.

Janar 2010

Pak por saktë – Universiteti NEHEMIA

Në 4 Janar 2010 Univesiteti NEHEMIA filloi vitin akademik pas një ceremonie të vogël hapjeje. Nëntë studentë përmbushën standartet e larta kualifikuese për degën „Bachelor of Arts në Biznes dhe Ekonomi“. Programi i Studimeve Duale ofron një eksperiencë të pasur nëpërmjet punës praktike që studentët kryejnë në Fondacionin NEHEMIA apo firma dhe biznese të ndryshme. Por gjithashtu edhe niveli akademik përmbush një standard të lartë Euro-Perëndimor; Profesorë të huaj me një eksperiencë të madhe ndërkombëtare do të jenë stafi akademik që do të japin mësim në universitet në Bucimas/Pogradec.

Dega „Master në Studime Europiane“ do të fillojë në Prill 2010 me metodën e mësimit të ndërthurur (në bashkëpunim me Insitutin Europian LIBERTAS, në Gjermani)

Pesë nga studentet aktualë janë nxënës që kanë studiuar në Shkollën NEHEMIA – një hap suksesi për sistemin e edukimit NEHEMIA: nga kopshti në universitet.

Për më shumë informacion mund të na vizitoni në: www.nehemia-uni.org

Dhjetor 2009

22.350 pako Krishtlindje

Fëmijeve nga 129 insitucione (shkolla, kopshte, spitale etj.) në zonat perreth Pogradecit, Tiranes dhe Durresit ju dhuruan pako për Krishtlindje. Këto pako u dërguan nga donatorë në Gjermani, Hollandë dhe Zvicer (nëpërmjet organizatave si humedica, SFI dhe CHW).

Punonjësit Social të NEHEMIA-s dhe vullnetarë nga Zvicra organizuan pjesën administrative, transportin dhe shpërndarjen e pakove. Në disa zona të thella malore transporti i këtyre pakove ishte me të vërtetë një sfidë e madhe, pasi rruget ishin të pakalueshme nga shirat dhe balta.

Ishte me te vertetë bekim të shikoje fytyrat e gëzuara te femijëve. Lavdi Zotit për këtë mundësi për të shpërndarë tek këta fëmijë lajmin e mrekullueshëm të Krishtlindjes!

Dhjetor 2009

NEHEMIA ne YouTube

Tani mund të na ndiqni edhe në YouTube.

Disa nga videot me te fundit te NEHEMIA-s jane publikuar edhe ne YouTube dhe ju mund te merrrni informacion mbi projekte si Edukimi NEHEMIA, Universiteti NEHEMIA dhe vete NEHEMIA. Mund te klikoni ne adresat e meposhteme perkatesisht:

Fondacioni NEHEMIA

Edukimi NEHEMIA nga kopshti ne universitet

Shtator 2009

Ndertime

Në tetor ndertimet filluan perseri! Ndërtesa e shumë nevojitur për shkollën e mesme dhe një shtëpi miqsh e mrekullueshme janë duke marrë formë tashmë brenda ambienteve të NEHEMIA-s në Buçimas.Punëtorë dhe makineri janë duke punuar gjatë gjithë kohës në menyrë që të arrijnë afatin ambicioz: Përfundimi i ndërtesave deri në verën e 2010! Shqiptarë dhe Gjermanë bashkëpunojnë ngushtë në këtë projekt të madh.Ndërtesa e re e shkollës se mesme do të përdoret edhe për Universitetin NEHEMIA. Ndërtimi modern, teknika ambientaliste dhe pajisjet cilësore janë një faktor shumë i rëndësishëm. Do të dëshironit që të kontribuoni në këtë projekt vizionar? Bashkohuni me grupin e 1000 donatorëve! Çdo kontribut i dhuruar deri në fund të vitit do të trefishohet!

Klikoni këtu për të marrë më shumë informacion.

Shtator 2009

“Te besh 3 here mire“

„Të bësh 3 herë mirë “ - ky është aksioni i veçantë që Fondacioni NEHEMIA ka ndërrmarë së fundmi. Ky aksion është i lidhur me projektin ndërkombëtar 1000 për arsimin. Një projekt ky që synon mbështetjen e proçesit arsimor të NEHEMIA-s në Shqipëri. Gjithashtu edhe ndërtimin e ambienteve të reja për Shkollën e Mesme dhe Universitetin NEHEMIA.

Ky aksion i veçantë do të zgjasë për një periudhë kohore prej gati 4 muajsh dhe çdo donacion i bërë gjatë kësaj periudhe është konfirmuar nga një donator që do të trefishohet.

Për këtë arsye ju ftojmë të bëni donacione deri në fund të vitit 2009!

Klikoni këtu për informacion mbi donacionet.

Gusht 2009

“ditë të hapura“ në Universitetin NEHEMIA, Pogradec

21-23 Gusht 2009 – “ditë të hapura“ në Universitetin NEHEMIA, Pogradec. Universiteti NEHEMIA fillon vitin akademik në tetor 2009 dhe në datat 4/21-23 Gusht organizon “ditë të hapura” ku fton të gjithë të interesuarit për t’u njohur nga afër me ambientet e universitetit dhe Fondacionit NEHEMIA, për t’u njohur me stafin akademik, ku do të ketë prezantime të ndryshme, pyetje dhe përgjigje nga profesorët e universitetit etj. Gjithashtu do të demonstrohet një lidhje online me profesorë jashtë Shqipërisë, për të ilustruar se si do të bëhet mësimi në distancë. Të gjithë të interesuarit janë të ftuar të marrin pjesë në këtë ditë të vecantë. Për më shumë informacion apo pjesëmarrje kontaktoni në:

Email:

info@nehemia-university.org

Tel: +355 (0) 868-20004

Korrik 2009

Kampi i Royal Rangers

Ashtu siç ishte planifikuar në 27 Korrik, u organizua kampi i Royal Rangers në Shqipëri. Këtë vit kampi u organizua në fshatin Buçimas, në një ambient shumë të freskët dhe të bukur, afër liqenit të Ohrit. Për herë të parë këtë vit, ky kamp u organizua tërësisht nga Royal Rangers në Shqipëri. Fëmijë nga Durrësi, Pogradeci dhe Elbasani morën pjesë në kete kamp, ku ishte i ftuar edhe një grup Royal Rangers nga Maqedonia. Qëllimi i këtij kampi ishte që të jepte një fryme bashkëpunimi tek drejtuesit dhe fëmijët në kamp, dhe kjo ndjenjë ishte e pranishme gjatë gjithë kampit. Të gjithë u larguan nga ky kamp me një premtim; që vitin që vjen të jenë përsëri pjesë e tij.

Maj 2009

Raporti Vjetor 2008 i NEHEMIA-s është gati per tu shkarkuar

Që prej vitit 1997 Zyra e Medias NEHEMIA ka përpiluar dhe publikuar raportin vjetor mbi aktivitetet dhe financat e Fondacionit. Në këtë raport do të gjeni ngjarjet kryesore për 2008 si dhe sfidat për 2009.

Gjithashtu do të gjeni informacion mbi Visioni, Misionin dhe Strukturen si dhe një informacion të detajuar mbi Projektet e NEHEMIA-s në tre fushat kryesore: edukimi, shërbesa frymërore dhe puna sociale. Natyrisht në kete raport gjendet edhe auditimi i liçensuar i të ardhurave si dhe raporti financiar.

Klikoni këtu për të shkarkuar Raportin Vjetor 2008 në format PDF.

Maj 2009

Familja Reichert

Pas disa vitesh shërbesë në Kishën NEHEMIA në Gjirokastër, Familja Reichert ka vendosur të largohet. Gjithsesi ata nuk do të largohen në Gjermani, por në një qytezë tjeter, ne Memaliaj. Gjate këtyre viteve Daniel dhe Monika kanë investuar shumë në Kishën NEHEMIA, që tani do të jetë nën drejtimin e vëllezërve dhe motrave shqiptare. Gjithsesi ata do të vizitojnë, këshillojnë dhe mbështesin kishën NEHEMIA gjatë kësaj periudhe. Në Memaliaj, Daniel dhe Monika do të ofrojnë seminare dishepullizimi dhe do të kujdesen për aktivitetet shpirtërore në atë zonë. Ne i urojmë atyre gjithë bekimet e Perëndisë në këtë detyrë të re që kanë ndërmarrë dhe u jemi shumë mirënjohës për kohën që kanë shërbyer me ne.

Prill 2009

Raporti vjetor

TIRANË 23 prill 2009 – Fondacioni NEHEMIA në Shqipëri prezantoi për publikun projektet dhe rezultatet e arritura përgjatë vitit 2008, si dhe planet për të ardhmen. I zhvilluar në ambientet e Pallatit të Kongereseve në Tiranë, aktiviteti synoi të bënte trasparente punën e fondacionit për 16 vitet e veprimtarisë në Shqipëri si dhe sfidat në vazhdim të punës së tij. Me investimet e konsiderueshme të bëra në fushat sociale, mjekësore, humanitare, arsimore-edukative dhe shpirtërore, kjo organizatë synon të përmbushë misionin e vet për të mbështetur zhvillimin e qëndrueshëm të shoqërisë shqiptare në një plan afatgjatë. Në prezantim morën pjesë përfaqësues të institucioneve shqiptare, politikanë, diplomatë, ekspertë të fushave të ndryshme, mbështetës të punës së organizatës, etj.

Prill 2009

Kros pranveror

Të Shtunën, 21 Shkurt 2009, u mbajt përkujtimorja e të ndjerit Alfred Wening, një mik besnik dhe një mbështetës i rëndësishëm i NEHEMIA-s në Shqipëri. Midis projekteve të shumta ai nisi dhe ndihmoi në ndërtimin e Qendrës NEHEMIA në Buçimas, ku fokusi i tij kryesor ishte tek ndërtesa e Kishës, si qendra dhe zemra e kompleksit. Për këtë arsye kjo ndërtesë u emërtua sipas tij. Një mozaik I mrekullueshëm me portretin e Alfredit (artisti: Anastas Konstandini, Taso), u shfaq në sallonin hyrjes së kishës nga arkitekti Helmut Hauser. Përgjatë ceremonisë shpresa u duk se shkëlqeu mbi trishtimin. Qëllimi i vetëm në jetë i Alfred Wening ishte ti shërbente Perëndisë dhe të ndihmonte njerzit në nevojë. Tashmë puna e tij e palodhur ka mbërritur në një finish dhe ai mund të prehet i qetë dhe të korr frytet e një jete shërbese për Perëndinë e Gjallë.

Shkurt 2009

Përkujtimore

Të Shtunën, 21 Shkurt 2009, u mbajt përkujtimorja e të ndjerit Alfred Wening, një mik besnik dhe një mbështetës i rëndësishëm i NEHEMIA-s në Shqipëri. Midis projekteve të shumta ai nisi dhe ndihmoi në ndërtimin e Qendrës NEHEMIA në Buçimas, ku fokusi i tij kryesor ishte tek ndërtesa e Kishës, si qendra dhe zemra e kompleksit. Për këtë arsye kjo ndërtesë u emërtua sipas tij. Një mozaik I mrekullueshëm me portretin e Alfredit (artisti: Anastas Konstandini, Taso), u shfaq në sallonin hyrjes së kishës nga arkitekti Helmut Hauser. Përgjatë ceremonisë shpresa u duk se shkëlqeu mbi trishtimin. Qëllimi i vetëm në jetë i Alfred Wening ishte ti shërbente Perëndisë dhe të ndihmonte njerzit në nevojë. Tashmë puna e tij e palodhur ka mbërritur në një finish dhe ai mund të prehet i qetë dhe të korr frytet e një jete shërbese për Perëndinë e Gjallë.

Janar 2009

Inaugurimi

Nё 22 Janar, nё fshatin Gurras, në Komunёn Buçimas, Pogradec, u bё inaugurimi i ndёrtesёs sё re tё kopshtit tё fёmijёve te kёtij fshati. Ky ёshtё nje kopёsht publik dhe i vetmi nё kёtё fshat.

Pёr fat tё keq kushtet nё ndёrtesёn e pёrshtatur pёr kopёsht ishin aspak tё pranueshme pёr fёmijёt. Fondacioni NEHEMIA nё kuadёr tё projekteve pёr zhvillim komuniteti, ndёrhyri pёr pёrmirёsimin e kushteve tё kёtij kopshti duke aplikuar pёr njё grant nё kuadёr tё ashtuquajturave grante tё vogla tё Ambasadёs Gjermane . Pёrmes financimit prej rreth 11.500€ u bë i mundur riparimi i dritareve të dëmtuara, rinovimi dyshemesë etj. Komuna Bucimas, gjithashtu kontribuoi financiarisht dhe me punonjёs pёr pjesёn tjetёr tё nevojitur. Njё shembull shumё i mirё bashkёpunimi midis Fondacionit NEHEMIA, Ambasadёs Gjermane nё Shqipёri dhe komunёs Bucimas.Nё inaugurim ishin tё pranishёm Kryetari i Komunёs Bucimas, pёrfaqёsues tё Ambasadёs Gjermane nё Shqipёri, Fondacioni NEHEMIA dhe fёmijёt e kopshtit dhe tё shkollёs sё bashku me prindёrit e tyre, tё cilёt kishin pёrgatitur edhe njё program tё shkurtёr artistik.

Jemi tё inkurajuar kur shohim se falё bashkёpunimit edhe mё pak mjete financiare, por me vullnetin e mirё mund tё arrihen rezultate tё prekshme.

Janar 2009

Humbëm një mik të dashur!

Humbëm një mik të dashur! Në Janar 2009 Alfred Wening papritur u largua nga kjo jetë dhe shkoi në Mbretërinë Qiellore. Për shumë vite me rradhë ai vazhdimisht dhe shumë aktiv mbështeti punën e NEHEMIA-s në Shqipëri. Ai ishte i njohur si „babai“ i organizatës partnere të NEHEMIA-s „Golden Cross Mission“, e cila mori një trashëgimi për të vazhduar dhe përmbushur punën e jetës se tij.Do të na mungojë urtësia, këshillat dhe eksperienca e tij në shumë fusha, gjithashtu edhe bekimet e lutjeve të tij të përditshme për ne.

Në 21 Shkurt, 2009 do të mbahet një përkujtimore në Buçimas si dhe emërtimi sipas tij, i ndërtesës së re të Kishës në mjediset e NEHEMIA-s.

Dhjetor 2008

Krishtlindje 2008

Me rastin e festave të Krishtlindjeve dhe Vitit të Ri, fëmijët e shkollës 9-vjeçare NEHEMIA, në Buçimas, Pogradec, përgatitën një operetë të shkurtër me temën: “Lindja e Krishtit“.

Me iniciativën e vet fëmijëve të kësaj shkolle dhe me ndihmën e mësueses së tyre, Anila Sinani, ata kanë punuar së bashku për një kohë të gjatë dhe pavarësisht moshës së tyre të vogël, ia dolën të organizojnë një shfaqje të vërtetë.

Një surprizë të këndëshme jo vetëm për mësuesit e prindërit e tyre, të shikonin fëmiejt e vegjël që debutonin në një gjini artistike aq të vështirë, por edhe gjithë të pranishmit e tjerë në atë shfaqe, duke dhënë një shembull të bashkëpunimit, disiplinës, krijimtarisë dhe këmbënguljes.

Shfaqja u dha për nxënësit dhe mësuesit e shkollës NEHEMIA, për antarët e kishës NEHEMIA dhe për banoret e fshatit Peshkëpi, në ambjentet e Shtëpisë së Kulturës së fshatit, e cila është rikonstruktuar dhe rinovuar nga partneri i Fondacionit NEHEMIA në Gjermani, “Golden Kreuz Mission”.

Dhjetor 2008

“Shoqata e Miqve të NEHEMIAS”

Në Shtutgart, Gjermani, u formua “Shoqata e Miqve të NEHEMIAS”.Synimet kryesore janë për te kombinuar dhe nxitur mundësite dhe aktivitetet e tyre dhe për të krijuar një rrjet më të gjerë miqsh dhe mbështetësish.

Kjo shoqatë do të ndihmojë me PR për Shqipërinë dhe projektet arsimore të NEHEMIAS, të koordinojë kontaktet me mbështetës dhe këshillues, të ndihmojë me ngritje fondesh dhe të fillojë një partneritet me shkolla dhe kisha, me një fokus të veçantë mbi Universitetin NEHEMIA.

Dëshironi të jeni anëtarë?

Për më shumë informacion ju lutem klikoni këtu

Nëntor 2008

“Nëntor 2008, moment historik për Royal Rangers Shqipëri! “

Fondacioni NEHEMIA është përfaqësuesi zyrtar i “Chartering Steward” për skautistët e krishterë “Royal Rangers” në Shqiperi. Marrëveshja “Provisional Chartering Steward Agreement” u nënshkrua në 07.11.2008, ne Shkup të Maqedonisë.

Në Shtator, të rinj të krishterë morën pjesë në “Kampin Nacional Trajnues”, i pari i këtij lloji në Shqipëri. Në të njëjtën kohë janë formuar posta të tjera RR në Pogradec dhe Elbasan, gjithashtu në kisha dhe qytete të tjera kanë filluar punët parapërgatitore. Shpresojmë që së shpejti të kemi një rrjet nacional postash RR ndërmjet grupeve dhe kishave të ndryshme.

Qëllimi I Royal Rangers është që të udhëzojë, sfidojë dhe frymëzojë fëmijët dhe të rinjtë ne fushën e njohurive biblike, misioneve të krishtera dhe sjelljes së moralshme përmes aktiviteteve të ndryshme që të rinjve u pëlqejnë. Sidomos aktivitetet e lidhura me natyrën do të zhvillojnë aftësitë dhe informimin e tyre social.

Nëntor 2008

“Puna sociale“

Bishnica është një fshat rreth 4 orë rrugë jo e asfaltuar me makinë, larg qytetit të Pogradecit. Në këtë fshat për shumë vite tashmë, partnerët e Fondacionit Nehemia, CHW, zhvillojnë disa projekte me qëllim zhvillimin dhe ndihmën e komunitetit atje.Një nga këto projekte është dhe krijimi I një konvikti për fëmijë, te cilët nuk kanë shkollë në fshatrat e tyre mund të gjejnë kujdes në konviktin në Bishnicë dhe të vazhdojnë edhe shkollën në të njëjtën kohë. Për shkak të mungesës së donatorëve ky konvikt nuk mund të hapej këtë vit në kohë.Mungesa e konviktit dhe shkollës do të thotë për këta fëmijë asnjë perspektivë për të ardhmen.Pas shumë kërkimesh parreshtur për donatorë të ndryshëm që të mbështesnin këtë projekt, Zoti edhe njëhere bëri mrekullinë e Tij dhe siguroi donatorët e shume kërkuar. Mirënjohja e prindërve dhe fëmijëve ishte shumë e madhe, pas këtij lajmi ky projekt mund të funksionojë përsëri normalisht.

Nëntor 2008

“Puna sociale“

"Të duam Perëndinë me gjithë zemrën, gjithë shpirtin dhe gjithë mendjen tonë, dhe të mësojmë të duam të afërmin si veten tonë", ky është Vizioni Nehemia dhe motivi i përditshëm i punonjësve në Fondacionin Nehemia.

Për rreth dy javë, një nga punonjëset e projektit social i ka shërbyer nënë Lytfies kur ajo kaloi një moment të vështirë shëndetsor në spital.Situata kërkonte që të ishte një person që duhet ta inkurajonte dhe të kujdesej për të 24 orë.

Nënë Lytfija është një grua e moshuar që ka 7 vjet që merr përkujdesje nga bashkpunëtorët e projektit social të Fondacionit Nehemia.

Nehemia shërben me zemër, duar dhe mendje. Gjithkush ka të drejtë të marrë ndihmë dhe mbështetje.Ne i kapërcejmë barrierat duke shërbyer...këto janë disa nga parimet bazë të Nehemia-s dhe të gjithë bashkëpunëtorëve të tij.

Këto parime na bëjnë çdo ditë të sfidojmë realitetin për njerëz si nënë Lytfija dhe të tregojmë se Zoti ynë është dashuri.

Tetor 2008

“adidas-NEHEMIA-Challenge Cup“

Në 11 Tetor, për herë të dytë u fitua kupa "adidas-NEHEMIA-Challenge Cup" nga skuadra e shkollës Buçimas, Pogradec.Kampionati u zhvillua në kuadrin e "Tetorit Gjerman".Këtë vit morën pjesë shkolla nga i gjithë rrethi, 32 nga 38 të cilat u kualifikuan për të vazhduar në finale.Strategjia unike e kupës është diversiteti i kritereve të vlerësimit si: performanca, loja në skuadër, ndershmëria dhe gjithashtu projekte sociale dhe bamirësie. Një koncept komplet i ri për shumë! Në këtë mënyrë fëmijët mësojnë të vënë në jetë vlera të rëndësishme si përgjegjësia, ndershmëria dhe respekti, dhe ky është dhe qëllimi i vërtetë i NEHEMIA-s dhe Adi Dassler Found për këtë kampionat.

Shtator 2008

“Udhëzuesi i madh i familjes“

Tashmë është gati në shqip: “Udhëzuesi i madh i familjes“ nga Claudia dhe Eberhard Mühlan. I kompletuar edhe me një seri videosh mbi edukimin e fëmijëve, ky material nëpërmjet këshillave praktike dhe konkrete iu përgjigjet pyetjeve të shumta të prindërve të rinj për edukimin që nga mosha foshnjore deri në pubertet.Autorët janë drejtues të shoqatës “Team. F – jeta e re për familjet”, e cila mundësoi realizimin e këtij projekti në bashkëpunim me Fondacionin NEHEMIA, SFI (Swiss Foundation International, Tirana), dhe CMW (Christliche Medienwerkstatt).

Shtator 2008

Universitetit NEHEMIA

Në 19 Shtator 2008, është prezantuar puna e Universitetit NEHEMIA. Deri në fillimin real të tij në Shtator 2009 do të bëhen shumë përgatitje për ta sjellë programin e universitetit në nivelet perëndimore. Kjo do të arrihet me ndihmën e shumë profesorëve dhe shkencëtarëve të njohur. Së pari do të hapet fakulteti “Ekonomi & Teknologji”, si dhe një master në “Studime evropiane”. Gjithashtu janë planifikuar edhe tre institute kërkimore në fushat: “Energji & Ekologji”, “Lidership Etik” si dhe “Hulumtime Statistikore” – një hap i parë i shkollës së lartë në fushën kërkimore dhe shkencore. Të pranishëm në eveniment ishin edhe Zv.Kryeministri shqiptar, si dhe Ambasadorët e Gjermanisë dhe Zvicrës.

Shtator 2008

“Edukimi Ndërkulturor”

Kualifikimi është gjithmonë një nga prioritetet e NEHEMIA-s. Mësuesit e shkollës NEHEMIA dhe Amaro Tan kanë marrë pjesë në një seminar me temë “Edukimi Ndërkulturor”. Qëllimi ishte ndërgjegjësimi për ngjashmëritë dhe dallimet midis kulturave, respektimi i identiteteve të ndryshme dhe gjetja e mënyrave për integrimin e këtyre koncepteve në shoqëri. Eralda Jesku, një nga folëset e seminarit thotë: “Termi “lehtësim” është një koncept sa sfidues edhe emocionues, pasi shpreh qartë atë për të cilin kanë nevojë nxënësit tanë – ata kanë nevojë për “lehtësim të proçesit të të mësuarit”, jo për mësimdhënie formale”.

Gusht 2008

Koha për hapat e mëtejshme!

Fondacioni NEHEMIA prezanton vizionin dhe strukturën e re, duke ndërtuar kështu themelin e punës së Fondacionit për vitet e ardhshëm. Më 29 gusht është prezantuar zyrtarisht ky koncept organizativ në kuadrin e një evenimenti të madh të zhvilluar në qendrën e NEHEMIA-s në Buçimas. Ky eveniment shënon kalimin në një fazë të re të zhvillimit dhe rritjes së shëndetshme të organizatës. Arnold Geiger, së bashku me një nga këshilluesit më të rëndësishëm, i cili ka ndihmuar në zhvillimin e konceptit, Erich Stamminger (President & CEO Brand adidas), dhe skuadra e NEHEMIA-s, kanë prezantuar konceptin para bashkëpunëtorëve, miqve dhe mbështetësve të punës së këtij Fondacioni.

Gusht 2008

Kampe verore

Kisha NEHEMIA edhe këtë vit ka organizuar kampe verore për fëmijë dhe adoleshentë në Gjirokastër, Durrës dhe Pogradec. Programi i pasur me lojëra, ekskursione, mësime nga Bibla, etj. ka bërë që fëmijët të kalojnë një kohë shumë të mirë dhe argëtuese me njëri-tjetrin.

Një falenderim i veçantë për të gjithë donatorët dhe bashkëpunëtorët vullnetarë, që kanë bërë të mundur zhvillimin e këtyre kampeve duke iu dhuruar një kohë të paharrueshme këtyre fëmijëve.

Gusht 2008

Dy arsye për të festuar

Më 08.08.08 Shkolla Nehemia festoi 10 vjetorin e fillimit të saj si dhe diplomimin e suksesshëm të maturantëve të parë. Rezultatet tregojnë qartë se koncepti i arsimit të Nehemias funksionon më së miri. Nxënësit kanë dalë shkëlqyeshëm në provimet e maturës duke u radhitur ndër më të mirët në shkallë republike. Në këto 10 vjet Nehemia ka investuar në drejtimin e arsimit duke ofruar një koncept arsimimi unik që fillon që nga kopshti dhe deri në Universitet. Krahas shumë të ftuarve të nderuar, në ceremoni kanë marrë pjesë edhe Ambasadori gjerman në Shqipëri Z.Borchardt si dhe Atasheja e Kulturës pranë kësaj Ambasade znj. Eidemüller.

Qershor 2008

Përgatitje për diplomën e gjuhës gjermane

Shkolla Nehemia synon të përgatisë nxënës për diplomën e gjuhës gjermane. Hapa të rëndësishëm janë bërë deri tani në këtë drejtim. Një grup nxënësish nga një shkollë e mesme në Shkup, bashkë me mësuesit e tyre kanë ardhur për një kurs intensiv parapërgatitor për provimin e diplomës së gjuhës gjermane. Kursi synon gjithashtu shkëmbimin e përvojave dhe fillimin e një bashkëpunimi me mësuesit dhe nxënësit e shkollës Nehemia. Marrja e kësaj diplome është e domosdoshme për nxënësit që duan të vazhdojnë një shkollë të lartë në Gjermani.

Qershor 2008

Medalja "Kryqi federal për merita"

Më 20.06.08, Arnold Geiger, drejtues i Fondacionit NEHEMIA dekorohet me medaljen "Kryqi federal për merita" të Republikës Federale Gjermane. Ai është nderuar me këtë dekoratë për angazhimin e tij në Shqipëri që prej vitit 1990. Kjo dekoratë është një vlerësim i veçantë për kontributin e tij në fushën politike, ekonomiko-sociale, dhe shpirtërore si dhe për merita të veçanta për Republikën Federale gjermane, në fushën e bamirësisë. Ceremonia e dekorimit është zhvilluar në ambientet e Ambasadës Gjermane në Tiranë dhe dekorimi është kryer nga Ambasadori gjerman Z.Borchardt.

Maj 2008

Kampi i Royal Rangers

Gjithçka e mësuar në teori, tani vihet në praktikë. Kampi është zhvilluar në Peshkëpi (Pogradec), dhe ka qenë një parapërgatitje për kampin e madh që do të organizohet në gusht. Pjesë e programit kanë qenë: ngritja e çadrave, orientimi me busull, ndezja e zjarrit, etj. “Rangers kanë si qëllim forcimin në trup, shpirt, frymë si dhe shoqërinë në skuadër. Për të arritur këto shpesh kemi nevojë të largohemi nga rutina e përditshme dhe të kalojmë një kohë të mirë me njëri tjetrin” – thotë Anila Sinani, drejtuese e grupit të Royal Rangers. Royal Rangers është një organizatë ndërkombëtare skautësh të krishterë që ka për qëllim edukimin e të rinjve sipas vlerave biblike. Në Shqipëri kjo organizatë është themeluar nëpërmjet Nehemias në tetor 2007.

Maj 2008

Punë dhe argëtim

Përveç mësimit dhe dijeve teorike që nxënësit e shkollës Amaro Tan marrin në këtë shkollë, ata inkurajohen edhe për punë praktike. Për shembull për zbukurimin dhe kujdesin ndaj oborrit të shkollës. Gjithë entuziazëm ata kanë pastruar, kanë ujitur dhe prashitur lulet për të zbukuruar shkollën e tyre. Kështu këta fëmijë mësojnë në të njëjtën kohë respektin ndaj natyrës dhe krijimit – një pikë shumë e rëndësishme kjo në programin e krishterë mësimor. Për shumë nga fëmijët e familjeve rome dhe atyre të varfëra hapen kështu perspektiva krejtësisht të reja.

Maj 2008

Trajnim kapacitetesh për Nehemian

Adi Dassler Fund nuk mbështet vetëm projekte sportive! Në kuadrin e programit "Capacity Building" (për fitimin e kompetencave), profesionistë nga adidas na këshillojnë dhe ndihmojnë për të organizuar punën e Nehemias në mënyrë efektive dhe profesionale. Miqtë tanë si shefja e personelit të adidas, apo drejtuesja e adidas-retail në SHBA, na ndihmojnë vazhdimisht me eksperiencën e tyre të pasur. Javën e kaluar, Constanze Wolf, asistente e CEO të markës adidas, na solli një rifreskim në organizim dhe komunikim. Këshillues të tjerë kanë njoftuar ardhjen e tyre. Kështu është vendosur baza për një rritje të mëtejshme dhe të shëndetshme të punës së Nehemias.

Prill 2008

Protezë krahu

Në punishten ortopedike MNA (partnere e Fondacionit Nehemia) prodhohet për herë të parë në Shqipëri një protezë funksionale-mekanike për krahun. Arturi 30 vjeç, që para 15 vitesh ka humbur krahun në një aksident nga një shpërthim bombe, ka privilegjin për të patur një protezë të tillë. Punishtja ortopedike është hapur në Shqipëri që prej vitit 2005 dhe ndihmon pacientët me proteza, orteza, shina dhe mjete të tjera ndihmëse. Përveç një punishteje të vogël në spitalin shtetëror ushtarak, ajo është e vetmja për prodhim protezash në Shqipëri.

Prill 2008

Trajnim kapacitetesh për misionarë të ardhshëm

Tabea Geiger së shpejti do të niset nga Nehemia si misionare për në Filipine. Për këtë arsye ajo i është ushtruar një trainimi praktik dy javor tek Nehemia në Shqipëri. Njohuri në menaxhim, llogarimbajtje dhe teknologji komunikimi kanë qenë pjesë e programit trainues të organizuar nga Forumi Profesional në Buçimas. Në të ardhmen kurse të tilla mund të jenë standart për bashkëpunëtorë të huaj nga Nehemia.

Mars 2008

Trajnim për ndihmës-infermieret

Shumë të varfër dhe të sëmurë në Shqipëri kanë nevojë për ndihmë urgjente, prandaj Nehemia i jep një rëndësi të veçantë shërbimit social. Ndihmës-infermieret tona kujdesen me shumë dashuri dhe përkujdesje për pacientët. Në mars 2008, Dr. Eberhard Brachtel, mjek i përgjithshëm dhe specialist në shiropraktik nga Gjermania ka investuar disa ditë nga pushimet e tij për të dhënë disa trajnime falas për bashkëpunëtoret e punës sociale. Përveç trajnimit në fushën e masazhit për të moshuarit dhe të paralizuarit ai ka dhënë udhëzime për trajtimin e mëtejshëm të pacientëve aktualë, si dhe ka kryer vizita me pacientë të rinj.

Mars 2008

Seminar për drejtuesit e të rinjve

Të rinjtë janë shumë të rëndësishëm për Nehemian. Për këtë arsye, bashkëpunëtorë nga degët e Nehemias në Durrës, Pogradec, Buçimas si dhe nga shkolla Amaro Tan, kanë marrë pjesë në një seminar 4 ditor në Golem, Durrës me temën: “Puna me të rinjtë në kishë”. Qëllimi i seminarit ishte të ndihmojë kishat dhe punën sociale me të rinjtë për të skicuar aktivitetet e tyre në një mënyrë interesante dhe tërheqëse që përputhet me nevojat e të rinjve sot. Nehemia ka prezantuar këtu edhe punën e Royal Rangers, që ka filluar në Pogradec në vjeshtë të vitit të kaluar. Organizator i këtij seminari ka qenë “Albanian Youth Ministry”.

Mars 2008

Prezantim i raportit vjetor

Në 16 prill 2008 është planifikuar nga Fondacioni Nehemia organizimi i një evenimenti në ambientet e Ambasadës Gjermane në Tiranë. Në këtë eveniment do të prezantohet aktiviteti i Fondacionit Nehemia gjatë vitit 2007, eksperiencat, sukseset, planet, si dhe sfidat që dalin përpara. Të ftuarit do të jenë miq dhe mbështetës të Fondacionit Nehemia nga fusha ekonomike, politike, sociale, kulturore etj. të cilët do të diskutojnë për mundësi bashkëpunimi dhe mbështetjen e projekteve të ndryshëm në të ardhmen.

Mars 2008

Partner për universitetin

Universiteti Nehemia, hapja e së cilit është planifikuar në vjeshtë 2008, ka siguruar një mbështetje shumë të vlefshme. Në kuadrin e një takimi informues më 15.03.08 në Buçimas, janë nënshkruar memorandumet e bashkëpunimit midis pesë universiteteve në Gjermani: Instituti Libertas, Universitetet AKAD, dhe dy universitete që janë në themelim Universiteti Gjerman në Armeni (DUA), dhe Universiteti CVJM në Kassel. Këto universitete do të bashkëpunojnë me Universitetin Nehemia ndër të tjera në fushën e mësimdhënies, kërkimeve studimore, mësimit në distancë, organizimit të shkollave verore, konferencave, etj.

Shkurt 2008

Standartet e shërbimeve shoqërore në Shqipëri

“Njohuri mbi standartet e shërbimeve shoqërore në Shqipëri” ishte tema e seminarit që u organizua më datë 14.02.08, nga Fondacioni Nehemia. Bashkëpunëtorë dhe partnerë të Fondacionit Nehemia janë udhëzuar në lidhje me standartet dhe dokumentacionin e kërkuar nga autoritetet shtetërore për çdo shërbim të kryer nga projektet tona sociale – një detyrë vërtet e madhe. Për këtë arsye procesi i dokumentacionit është hapi i ardhshëm, në mënyrë që të arrijmë qëllimin kryesor: përdorimin optimal të donacioneve me një ndikim të ndjeshëm në jetën e njerëzve në nevojë.

Janar 2008

Më shumë se ndihmë materiale

Njerëzit në nevojë që përfitojnë nga shërbimi i punës sonë sociale, kanë shumë më tepër nevojë se thjesht ushqim, veshje apo medikamente. Vizitat në shtëpi dhe bisedat në mensë tregojnë qartë se problemi i tyre më i madh është vetmia. Ne mundohemi t’i ndihmojmë edhe në këtë aspekt. Një shembull konkret i kësaj ndihme është festa e organizuar javën e kaluar në Pogradec, ku këta njerëz ishin vërtet „protagonistët“. Pjesë e programit ishin: një film për punën tonë sociale, një devocion i shkurtër nga Bibla, këngë, një ushqim i mirë dhe një kohë e shkëlqyer miqësie.

Janar 2008

Eksperiencë mësimore në Gjermani

Edhe këtë vit dy nxënëseve nga shkolla Nehemia iu jepet mundësia për të studiuar në shkollën tonë partnere në Gjermani "Stiftung Landheim Schondorf", për një periudhë tre mujore. Pas një para-përzgjedhjeje të kujdesshme janë zgjedhur 4 nxënës për intervistën finale. Pyetjet në fusha të ndryshme testuan njohuritë e tyre, personalitetin, pjekurinë dhe motivimin. Pjesa më e madhe e intervistës u zhvillua në gjuhën gjermane. Përzgjedhja nuk ishte e lehtë, pasi të gjithë ishin shumë të talentuar dhe të motivuar. Më në fund fituese u zgjodhën Shirli Hamzallari dhe Ledia Cici (klasa XI). Të dyja janë shumë entuziaste për realizimin e ëndrrës së tyre të madhe.

Janar 2008

Donacion

Nxënës të shkollës së mesme Goethe në Reichenbach/Gjermani kanë investuar një dite pune për qëllime bamirësie. Në „ditën e tyre sociale", ata morën përsipër punë të ndryshme në firmat e rajonit dhe 30 % të fitimit e kanë dhuruar për një "qëllim të mirë". Nxënësit e kësaj shkolle vendosën të mbështesin Shkollën Nehemia në Bucimas, ose më saktë bibliotekën e saj. Në 14 Janar 2008, drejtuesit të Nehemias në Shqipëri, Arnold Geiger i është dorëzuar donacioni bujar prej 305 €.

Ne jemi shumë mirënjohës dhe i falenderojmë nga zemra këta fëmijë.

Janar 2008

Ndarje

Brigitte Weber, drejtuese e degës Nehemia në Gjirokastër pas një shërbese prej 16 vitesh, rikthehet në Zvicër. Ajo ka qenë një ndër misionaret e para të Nehemias në Shqipëri. Që prej 1995 ka drejtuar punën në Gjirokastër, ku ndër të tjera është kujdesur edhe për shërbesën e kishës dhe punës sociale: mbështetje për azilin e pleqve, mensën, etj. Në vitin 2002, ajo është nderuar nga bashkia e Gjirokastrës me titullin “qytetare nderi”.

Ne jemi shumë mirënjohës për përkushtimin e saj dhe i urojmë bekimet e Zotit për të ardhmen.

Dhjetor 2007

Zhvillim komuniteti

Projekti për zhvillimin e komunitetit tashmë po zgjerohet edhe në fshatra të tjera të rrethit të Pogradecit. Përveç Peshkëpisë në bashkëpunim me GKM tani pjesë e këtij projekti janë bërë dhe fshatrat Hudënisht dhe Lin. Qëllimi i këtij projekti është mbështeteja e komunës për zhvillimin e këtyre fshatrave.

Hapat e para në këtë drejtim tashmë janë hedhur:

- Eshtë firmosur marrëveshja e bashkëpunimit midis shkollës Nehemia dhe drejtorive të shkollave të komunës Hudenisht.

- Janë hapur projektet e punës sociale, edukimit dhe zhvillimit të komunitetit.

- Ka filluar instalimi i sistemit të ngrohjes në kopshtin e Hudënishtit dhe janë furnizuar me pajisje zyrat e administratës së komunës.

Shumë projekte të tjera në kuadër të zhvillimit të komunitetit do të vijojnë në 2008.

Dhjetor 2007

Një mundësi për një të ardhme më të mirë

Në 15 dhjetor në ambientet e Fondacionit Nehemia Buçimas, është zhvilluar një takim me të gjitha gratë që nuk kanë pasur mundësi për një punësim të mirë për shkak të mos kualifikimit të tyre. Qëllimi i këtij takimi, ishte t’u ofronim këtyre grave një mbështetje morale për të rritur vetvlerësimin e tyre dhe për t’i nxitur për trajnim e kualifikim, në mënyrë që në të ardhmen të kenë mbështetjen tonë për hapjen e biznesit të tyre privat. Në këtë kuadër është folur për fushat e ndryshme të interesit të këtyre grave, me qëllim ofrimin e kurseve aty ku ato kanë nevojë.Për vitin 2008 është planifikuar fillimi i kurseve sipas kërkesave të tyre (falas ose me një pagesë minimale).

Dhjetor 2007

Dhurata për Krishtlindje

Edhe këtë vit, fëmijë nga shkolla dhe kopshte në fshatra kanë marrë me gëzim pakot me dhurata për Krishtlindje. Për shumë fëmijë nga familje të varfëra ky është gëzimi më i madh i vitit dhe shpesh mundësia e tyre e vetme për të dëgjuar mesazhin e Krishtlindjes. Familje në Gjermani dhe Zvicër kanë përgatitur me shumë dashuri mijëra pako për fëmijët shqiptarë. Organizatat humanitare Humedica, SFI dhe CHW kanë marrë përsipër tranportimin e këtyre pakove dhe skuadra e punës sociale të Fondacionit Nehemia është kujdesur për shpërndarjen e tyre tek këta fëmijë.

Dhjetor 2007

Shkolla Amaro Tan

Nehemia ka adoptuar një projekt të mrekullueshëm: Amaro Tan, një shkollë e krishterë private në Pogradec, që kujdeset për më të varfërit e shoqërisë, kryesisht fëmijë të komunitetit rom dhe fëmijë me te meta fizike/mendore. Përveç një arsimi cilësor, Amaro Tan ofron gjithashtu ushqim, mbështetje mjekësore, dhe lufton trafikimin e qenieve njerëzore. Kjo shkollë është themeluar në vitin 2002 nga OJF “Të rinjtë me një mision”. Për të kombinuar kapacitetet, dhe për një eficencë maksimale, Nehemia ka rënë dakord që të drejtojë këtë projekt, duke përfshirë dhe përgjegjësinë financiare.

Nëse dëshironi të kontribuoni për t’iu dhënë një mundësi në jetë këtyre fëmijëve, ju lutemi na kontaktoni!

Nëntor 2007

Shkolla e mesme me kohë të shkurtuar

Në tetor 2007, është hapur shkolla e mesme “Nehemia” me kohë të shkurtuar. Kjo shkollë iu jep një mundësi për t’u arsimuar dhe për t’u përballur në të ardhmen me sfidën e një arsimi cilësor, atyre të rinjve që nuk kanë pasur mundësi për të vazhduar shkollën e mesme. Disa prej tyre janë nga familjet në nevojë që marrin vazhdimisht ndihmë ekonomike nga projekti i punës sociale. Pikërisht ky projekt, po mundëson tashmë edhe arsimimin e fëmijëve të këtyre familjeve duke dhënë një ndihmë tërësore, për një të ardhme më të mirë.

Nëntor 2007

Këndi i ri i lojërave

Më 9 nëntor 2007 u inaugurua këndi i lojërave të shkollës Nehemia në Bucimas. Ky kënd ofron një mundësi më shumë argëtimi jo vetëm për nxënësit e ciklit të ulët të kësaj shkolle, por edhe për fëmijët e miqve që vizitojnë shpesh Fondacionin Nehemia, fëmijët që marrin pjesë në kampet verore, etj. Ndërtimi i këndit të lojërave u bë i mundur nga donacionet bujare të fëmijëve të shkollës sonë partnere në SHBA, „Trinity Oaks Christian Academy“ dhe u ndërtua nën drejtimin e bashkëpunëtorit tonë vullnetar nga Zvicra, Fred Ryter.

Nëntor 2007

Biblioteka Nehemia

Biblioteka e shkollës Nehemia tashmë vë në dispozicion të lexuesve 2500 libra të tematikave të ndryshme në tre gjuhë. Ajo që e bën të veçantë këtë bibliotekë është kërkimi online i librave. Çdo libër është regjistruar në internet sipas sistemit Dewei ID, duke iu mundësuar lexuesve zgjedhjen e librave nga interneti. Gjithashtu në bashkëpunim me bibliotekën shtetërore të Bavarisë në Gjermani është premtuar aksesi online i librave të kësaj biblioteke. Së shpejti përveç librave, biblioteka do të ofrojë edhe DVD, Video dhe CD. Kjo bibliotekë është një hap i shumë i rëndësishëm drejt universitetit Nehemia, i cili është planifikuar të hapet në tetor 2008.

Tetor 2007

Fëmijët ndihmojnë njerëz në nevojë

Një grup prej 29 fëmijësh dhe adoleshentësh nga Zvicra kanë vizituar Fondacionin Nehemia në Pogradec nga data 6-14 tetor. Misioni i grupit të quajtur "Antivirus" është të sjellin shpresë tek të sëmurët, të moshuarit dhe njerëzit në nevojë. Ata janë bashkuar me projektin e punës sociale për të ndihmuar atje ku ka nevojë; punë praktike në shtëpitë e të sëmurëve dhe të moshuarve, vizita në spitalin pediatrik, ku kanë shpërndarë dhurata për fëmijët e sëmurë, etj. Gjithashtu ata kanë organizuar edhe një takim me lojëra dhe këngë për fëmijët me aftësi të kufizuara.

Tetor 2007

adidas-Nehemia Challenge Cup

Nga data 28.09 - 13.10.07, në kuadër të javëve të kulturës gjermane, Fondacioni Nehemia dhe adidas, organizojnë aktivitetin sportiv “Kupa adidas-Nehemia”. Lojërat do të zhvillohen në këndin sportiv Nehemia. Në bashkëpunim me drejtoritë e shkollave të komunës Buçimas, në këtë aktivitet do të marrin pjesë nxënës të shkollave të kësaj komune dhe shkollës Nehemia. Ndeshjet që do të zhvillohen janë: mini-futboll për meshkuj, volejboll për meshkuj dhe femra, dhe basketboll. Qëllimi i kupës është të mbështesë Team play dhe Fair play. "Kupa adidas-Nehemia", e cila jepet për herë të parë, është fillimi i një kampionati të përvitshëm.

Tetor 2007

„Black Forest Brassband Altensteig“ në Buçimas

Në vazhdim të aktiviteteve të zhvilluara në kuadër të Javëve të Kulturës Gjermane, Fondacioni Nehemia më 12.10.07, organizon koncertin e orkestrës frymore „Black Forest Brassband Altensteig“ (Gjermani). Ky koncert do të zhvillohet në ambientet e Fondacionit Nehemia/Buçimas. Brassband është një ansambël i madh (35 muzikantë) me vegla frymore dhe bateri. Në këtë koncert do të interpretohen edhe dy pjesë të njohura në të gjithë botën, duke kombinuar brassband-in me kitarën elektrike.

Shtator 2007

Ndarje

Bashkëpunëtori ynë Martin Krejci kthehet në Gjermani. Ai ka punuar për 4 vite tek NEHEMIA, si inxhinier elektronik dhe ka ndihmuar për raste mjekësore. Në sajë të një lidhje satelitore që ai ka instaluar, tani kemi internet 24 orë në ditë. Martini është gjithnjë i gatshëm për të ndihmuar në fusha të ndryshme si: instalime kamerash, aparatura me rreze X, ndihmë në raste emergjente, etj. Ai do të vazhdojë një shkollë Bible në Gjermani, por e ka të vështirë ndarjen: "Më shumë do të më mungojë miqësia me njerëzit këtu ", thotë ai. Me humorin e tij të hollë, Martini do të na mungojë të gjithëve.

Shator 2007

Vizita e delegacionit gjerman

Një delegacion prej pesë specialistësh në fushën e arsimit nga Gjermania, kanë vizituar nga 04-09.09.2007, ambientet e Fondacionit Nehemia në Buçimas. Qëllimi kryesor i vizitës ishte bashkëpunimi për përgatitjen e hapjes së Universitetit Nehemia dhe marrëdhëniet midis këtij Universiteti me atë të Eichstätt, në Gjermani. Në kuadrin e shkëmbimit të eksperiencave në fushën e arsimit në Shqipëri, profesorët janë takuar me këshilltarin e kryeministrit për shkencën, atashehen kulturore të ambasadës gjermane në Shqipëri, si dhe zyrtarë të tjerë të lartë. Gjatë kohës së qëndrimit në Buçimas, ata kanë dhënë disa seminare për mësuesit dhe nxënësit e shkollës Nehemia, në lidhje me përmirësimin e mësimdhënies, rrjetin kompjuterik dhe komunikimin elektronik në shkollë, etj.

Gusht 2007

Eva

Eva Geiger, vajza e drejtuesit të Nehemias në Shqipëri, do të fillojë në shtator 2007 një shkollë profesionale në Gjermani. 2 vite me radhë, ajo ka punuar vullnetarisht (pa pagesë), në shtëpinë e miqve në Bucimas, ku ka gatuar dhe pastruar për miqtë e shumtë që vijnë nga vende të ndryshme, për të mbështetur punën e Fondacionit Nehemia. Megjithëse Eva është shumë e talentuar në punime artizanale, e ka lënë mënjanë interesin e saj për të shërbyer. 20 vjeçarja është gjithmonë e gatshme për të shërbyer atje ku ka nevojë.

Gusht 2007

Konferenca e Shkollës së Biblës

Më shumë se 70 të rinj të krishterë nga kisha të ndryshme në Shqipëri, kanë marrë pjesë në një konferencë, që është zhvilluar në ambientet e Qendrës Nehemia Bucimas, në 6 -11 gusht 2007. Organizuese e konferencës ishte "Shkolla e Biblës" Pogradec, organizatë partnere e Fondacionit Nehemia. Qëllimi ishte motivimi i të rinjve për të qenë aktivë në kishat e tyre lokale. Një nga folësit kryesorë ishte Mike Chance. Pastori amerikan është i njohur për mësimet e tij në kisha të ndryshme në mbarë botën. Gjithashtu edhe drejtuesi i Nehemias në Shqipëri, Arnold Geiger ka mbajtur një seminar. Folës të tjerë të ftuar ishin Gary Stevens (Australi) dhe Yvonne Wittmer (Gjermani).

Korrik 2007

Kamp veror në Gjirokastër

Një kamp veror është zhvilluar në korrik 2007 në kishën Nehemia Gjirokastër. Gjatë kampit për 90 fëmijët nga 7-15 vjeç, janë organizuar ekskursione në qytet dhe rrethina, lojëra të ndryshme, mësime nga Bibla, etj. Një nga kujdestaret ishte Anila, një mësuese e shkollës Nehemia Buçimas, e cila ka sakrifikuar një javë të pushimeve të saj për këtë kamp fëmijësh. “Veçanërisht më kanë pëlqyer ‘Lojërat olimpike’, me disiplina të ndryshme sportive” thotë ajo. “Kemi mësuar që gjëja kryesore nuk është fitorja apo humbja, por miqësia e mirë me njëri-tjetrin.”

Korrik 2007

Vizitor VIP

Një i ftuar special ka vënë në dispozicion të Nehemias njohuritë dhe eksperiencën e tij të pasur: Erich Stamminger, President dhe CEO i markës “adidas” si dhe anëtar i Bordit Ekzekutiv i "adidas AG". Ai ka kaluar disa ditë pushimi në Buçimas. Drejtuesi i Nehemias Arnold Geiger dhe skuadra e tij e drejtimit kanë mësuar shumë prej tij, sidomos në fushën e strategjisë, motivimit dhe vendosjes së objektivave për projektet e reja. I ftuari ynë ka dhënë një vlerësim të lartë dhe lavdërim për punën e Nehemias - një inkurajim i madh për ne dhe mbështetësit tanë!

Korrik 2007

Kopsht veror

Gjatë muajit korrik, shkolla Nehemia ofron kopsht veror pa pagesë për fëmijët parashkollorë. Për katër javë fëmijët do të kenë mundësi të përgatiten intensivisht për klasën e parë, të ushtrohen në lojëra lëvizore, punime arti, interpretime, dramatizime të shkurtra, ekskursione etj. Në dispozicion të realizimit të këtyre aktiviteteve do të jenë mjediset e kopshtit Nehemia, këndi i lojërave për fëmijët e moshës së ulët shkollore si dhe kompleksi i ri sportiv Nehemia.

Qershor 2007

Seminar

Projektet e Nehemias po rriten vazhdimisht, gjë që e bën qendrën e medias Nehemia, një projekt me një rëndësi gjithmonë e në rritje, ku prodhohen informacionet dhe materialet e prezantimit për donatorët, mbështetësit dhe publikun. Produktet tona përfshijnë një gamë të gjerë shërbimesh si: grafikë, montim videosh, web design, etj. Trajnimi i vazhdueshëm i stafit tonë është esencial për një punë sa më cilësore. Javën e kaluar, Johannes Goldammer nga Gjermania, një specialist në fushën e tipografisë, ka drejtuar një seminar rreth para-përgatitjes së dokumentit për botim.

Qershor 2007

Vatra e kulturës

Vatra e kulturës në Peshkëpi është në gjendje të mjerueshme dhe për momentin nuk ka asnjë funksion. Duke parë nevojën që ekzistonte këtu, partneri ynë “Misioni i Kryqit” në kuadër të projektit për zhvillimin e komunitetit, krahas shumë projekteve të tjera, ka filluar me restaurimin e kësaj ndërtese. Është planifikuar që kjo vatër kulture do të jetë një ndërtesë moderne dhe përveç restaurimit të godinës së vjetër do të ndërtohen edhe disa ambiente shtesë si: një kuzhinë, një magazinë e vogël, verandë, kopësht etj.

Qershor 2007

Shkëmbim eksperiencash

Dy mësuese të shkollës sonë, janë dërguar për një kohë praktike në shkollën partnere në Gjermani: "Landheim Schondorf am Ammersee",  një nga shkollat e mesme më prestigjioze në Bavari. Këtu ato mund të mësojnë metodat moderne të mësimdhënies dhe menaxhimin shembullor të shkollës. Në Schondorf krahas proçesit teorik mësimor, ofrohen një shumëllojshmëri kursesh artizanale, arti dhe sporti. Ky koncept duhet të zbatohet hap pas hapi edhe në shkollën Nehemia - një risi në Shqipëri.

Maj 2007

Fusha sportive

Në sajë të Adi Dassler Fund (adidas), Shkolla Nehemia në Buçimas tashmë ka një fushë sportive shumë funksionale, në të cilën nxënësit e shkollës Nehemia do të kenë mundësi të luajnë lojëra të ndryshme sportive si: volejboll, basketboll, futboll, tenis, etj.

Kjo fushë sportive moderne, e cila është e vetmja e kësaj cilësie në të gjithë qytetin, do të jetë e hapur edhe për skuadra të tjera, që mund të përgatiten për mini-olimpiada apo ndeshje të ndryshme. Hapi tjetër i bashkëpunimit do të jetë organizimi i ndeshjeve rajonale dhe kualifikim për trajnierët. Gjithashtu është planifikuar edhe një trajnim dhe kualifikim i veçantë nga sportistë të njohur nga e gjithë bota.

Prill 2007

Seminar

Gerhard du Toit, ka qenë i ftuar për të drejtuar një seminar 3 ditor në kishën Nehemia në Pogradec. Në këtë seminar morën pjesë shumë besimtarë të krishterë jo vetëm nga Pogradeci, por edhe nga zonat përreth. Du Toit është një folës i njohur për besimtarët e krishterë në të gjithë botën; qëllimi i tij është inkurajimi dhe forcimi në besim i të krishterëve dhe kishave, me fokus lutjen dhe ndërmjetësimin. Eksperiencat e tij personale në vendlindjen e tij Afrikën e Jugut, njohuria e plotë teologjike dhe një jetë personale intensive në lutje, i bëjnë seminaret e tij një eksperiencë të paharrueshme për të gjithë.

Prill 2007

Zhvillim komuniteti

Fondacioni Nehemia prej 5 vitesh ndihmon zhvillimin e komunitetit në fshatin Peshkëpi, Pogradec. Një nga projektet më të rëndësishme, që është në proces për momentin në këtë fshat, është kanalizimi i ujërave të zeza. Deri tani janë bërë matjet dhe hartat përkatëse. Së shpejti do të fillohet me përcaktimin e kanalizimeve në terren dhe më pas me vendosjen e tubacioneve me ndihmën praktike të banorëve të fshatit. Projekti i zhvillimit të komunitetit është bërë i mundur në bashkëpunim të ngushtë me organizatën tonë partnere GKM (Misioni i Kryqit).

Prill 2007

Ndihmë për personat me aftësi të kufizuara

Eberhard Brachtel nga Gjermania, ka ardhur për një javë në Pogradec, për të trajnuar ndihmës infermieret e punës sociale të Fondacionit Nehemia në fizioterapi, ergoterapi dhe masazhe të ndryshme. Pothuajse çdo ditë, kemi kërkesa të reja nga pacientë, të cilët kanë nevojë për ushtrime të ndryshme terapeutike. Deri tani është vënë re një progres i dukshëm në pacientët tanë të vegjël me aftësi të kufizuara.

Mars 2007

Rreze shprese

Javën e kaluar u organizua në ambientet e qendrës Nehemia (Pogradec), një takim për gratë në nevojë, që janë pjesë e shërbimit të punës sociale. Në këtë takim bashkëpunëtoret tona kishin përgatitur një program të këndshëm, ku theksohej vlera e gruas sipas Biblës. Në fund të takimit, u zhvillua një koktej dhe secila prej grave ka marrë nga një dhuratë. Ky është edhe qëllimi i punës sonë: krahas ndihmës materiale dhe mjekësore, të sjellim dritë dhe inkurajim në jetët e klientëve tanë, jo vetëm nga ana fizike, por dhe shpirtërore.

Mars 2007

Qendra e kujdesit ditor

Qendra e kujdesit ditor në Durrës, kujdeset për fëmijët e komunitetit rom, të cilët shpesh ndeshin në diskriminim dhe përbuzje. Prandaj ne kujdesemi për ta me dashuri, duke i edukuar në sjelljet shoqërore, mësimet mbi higjienën, etj. Përveç edukimit, në këtë qendër fëmijët marrin dhe një ushqim të ngrohtë çdo ditë. Bashkëpunëtorët tanë ndihmojnë gjithashtu prindërit për të regjistruar fëmijët e tyre në Zyrën e Gjendjes Civile, duke dhënë kështu një kontribut të madh në luftën kundër trafikimit të qënieve njerëzore. Ky projekt financohet vetëm nga donacione vullnetare.

Mars 2007

Ndihmë për të moshuarit

Nënë Lytfia jeton vetëm. Ajo nuk ka fëmijë dhe burri i saj ka vdekur para shumë vitesh. Përveç ndihmës së vazhdueshme me ushqime, punonjëset e shërbimit social të Nehemias kujdesen rregullisht për të duke e ndihmuar në punët e shtëpisë, larjen e hekurosjen e rrobave, etj. Fatkeqësisht për shkak të sëmundjes së saj (parkinson) ajo nuk mund të vijë në mensën tonë, prandaj ne i çojmë një vakt dreke në shtëpi çdo ditë. Nënë Lytfia është shumë mirënjohëse për kujdesin që merr çdo ditë.

Mars 2007

Fizioterapi

Fizioterapia është një trajtim relativisht i ri në Shqipëri. Për shumë kohë ka qenë e panjohur dhe si rrjedhim nuk ka shumë njerëz të kualifikuar në këtë drejtim. Për këtë arsye ndihmës infermieret e shërbimit social të Nehemias trajnohen vazhdimisht nga terapistë gjermanë të kualifikuar. Në këtë mënyrë gjatë vizitave në familje, ato mund të trajtojnë shumë të sëmurë që kanë nevojë për këtë shërbim. Ira Hauptmann është dërguar për një vit nga Kisha e Sohland (Gjermani), për të trajnuar dhe shoqëruar punonjëset e kujdesit shëndetësor të Nehemias, në këtë fushë.

Shkurt 2007

Seminar

Paul Donders dhe Bert van Heiningen, nga Xpand (Hollandë) ishin folësit e ftuar në Pogradec, për të drejtuar seminarin tre ditor mbi menaxhimin për drejtuesit. Ky seminar ishte fokusuar në menaxhimin e cilësisë, konflikteve, zhvillimin e personelit dhe menaxhimin sipas objektivave. Nëpërmjet shembujve konkretë, workshopeve të zhvilluara, si dhe ushtrimeve dhe lojërave praktike, pjesëmarrësve iu dha mundësia të merrnin pjesë aktive dhe të përfitonin shumë nga ky seminar. Pesë seminare të Paul Donders janë tashmë në DVD dhe VHS (anglisht-shqip) dhe seminari i fundit do të jetë gati pas pak javësh. Nëse jeni të interesuar ju lutemi na kontaktoni.

Shkurt 2007

Shkëmbim përvojash

Lazaron Gusho dhe Lirida Krëste, nxënës të shkollës Nehemia do të studiojnë nga marsi deri në qershor, në shkollën tonë partnere “Landheim Schondorf“ në Gjermani. Ata iu nënshtruan një procedure të rreptë, të drejtuar nga një komision me specialistë të arsimit, në Tiranë – me rezultate shumë inkurajuese: 8 nxënësit që morrën pjesë në konkurs dolën shkëlqyeshëm, duke treguar aftësi shumë të mira komunikimi dhe njohurish në gjuhët e huaja. Të gjithë morën një vlerësim maksimal personaliteti dhe karakteri. Zgjedhja nuk ishte e lehtë!

Janar 2007

Universiteti, gati për miratim!

Universiteti privat Nehemia, do të hapë dyert në verë 2008 (planifikuar) në Bucimas/Pogradec. Kjo u jep maturantëve tanë të parë, mundësinë për të vazhduar një arsim të lartë cilësor, direkt në qytetin e tyre. Dokumentacioni i kërkuar për miratim, është dorëzuar në Ministrinë e Arsimit në Dhjetor 2006.

Për më shumë informacion:                                             http://www.nehemia-al.org/University.111.0.html

Janar 2007

Siguria

Fondacioni Nehemia i kushton një vëmendje të veçantë sigurisë në punë. Në këtë kuadër, është zhvilluar këtë javë një trajnim për bashkëpunëtorët për marrjen e masave në rast zjarri. Gjatë këtij trajnimi, bashkëpunëtorët dhe nxënësit e shkollës Nehemia janë njohur me proçedurën, që duhet të ndjekin në raste emergjence. Nehemia në Buçimas ka edhe një skuadër zjarrfikësish të pajisur mirë, të cilët janë trajnuar intensivisht gjatë kësaj jave.

Trajnues: Martin Aeschbach - Trajnues dhe teknik për sigurinë në punë. (Zvicër)

Janar 2007

Kënd lojërash

Tashmë fëmijët e qytetit të Gjirokastrës kanë një mundësi më shumë për t’u argëtuar.

Fondacioni Nehemia në Gjirokastër me ndihmën e donatorëve nga Zvicra ka ndërtuar një kënd lojërash për fëmijë. Këtu kalojnë kohën e lirë shumë fëmijë të shoqëruar nga prindërit e tyre, si dhe fëmijë të shkollave përreth. Ky kënd i vogël lojërash është i vetmi në të gjithë qytetin (35000 banorë).

Janar 2007

Përfundimi i themeleve

Tashmë ka përfunduar me sukses hedhja e themeleve të shkollës së mesme Nehemia.

Në pranverë 2007 do të fillojmë me fazën e dytë të ndërtimit. Falenderojmë të gjithë donatorët që bënë të mundur fazën e parë të ndërtimit. Të gjithë emrat e donatorëve që kanë kontribuar deri tani për ndërtimin e shkollës, janë shkruar në tabelën e 1000 emrave.

Dhjetor 2006

Dhurata për Krishtlindje

5.000 pako me dhurata për Krishtlindje janë shpërndarë, jo vetëm për fëmijët e shkollës Nehemia por edhe për shumë shkolla të tjera publike nëpër fshatra. Këto dhurata janë përgatitur nga bashkëmoshatarët e tyre nga Hollanda dhe Gjermania. Ne falenderojmë përzemërsisht të gjithë fëmijët për dhuratat, që u kanë dërguar fëmijëve në Shqipëri.

Fondacioni Nehemia iu uron të gjithëve GEZUAR FESTAT!

Dhjetor 2006

Kompjutera

Kisha „Jesus Gemeinde Sohland“ nga Gjermania na ka mbështetur vazhdimisht në punën tonë nëpërmjet donacioneve të saj në fusha të ndryshme, duke na ndihmuar jo vetëm me financa por edhe me bashkëpunëtorë.

Së fundmi ajo ka dhuruar për shkollën Nehemia 11 kompjutera, që janë një ndihmë e madhe për përmirësimin e orës mësimore të informatikës.

Dhjetor 2006

Trajnim për drejtuesit e automjeteve

Javën e kaluar, është zhvilluar një trajnim për drejtimin e automjeteve për bashkëpunëtorët e Fondacionit Nehemia, të cilët janë trajnuar teorikisht dhe praktikisht për drejtimin e automjetit në kushte të vështira atmosferike, sigurinë në rrugë dhe drejtimin me efektshmëri sidomos për automjetet e pasagjerëve (furgona, autobusa, etj.). Trajnues: instruktori Thomas Hertel, nga kompania Revex/Gjermani.

Nëntor 2006

Riciklim

Denisi është vetëm 16 vjeç dhe punon rëndë për të siguruar të ardhura për familjen e tij, prej 9 personash. Prej një viti ai ka filluar të mbledhë nëpër koshat e plehrave, shishe plastike, për riciklim. Nehemia siguron një ambient (në të cilin ai grumbullon shishet e mbledhura), një makineri për grirjen e plastikës dhe gjithashtu transportim për në fabrikën e riciklimit. Ky mini-projekt është një ndihmë e madhe jo vetëm për familjen, por edhe për mjedisin, pasi në Shqipëri problemi i plehrave është shumë i madh. Riciklimi është kryesisht i panjohur, dhe në të shumtën e rasteve plehrat digjen nëpër rrugë duke lëshuar kimikate të dëmshme për shëndetin.

Nëntor 2006

Një festë e suksesshme!

Më 24 Nëntor shumë të ftuar, midis tyre dhe shumë personalitete, kanë ardhur për të festuar së bashku hapjen e themeleve për ndërtesën e re të shkollës në Buçimas/Pogradec. Në foto: Arkitekti Helmut Hauser (hauserpartner Gjermani) dhe drejtori i ciklit të lartë të Shkollës Nehemia Gjergji Bice, gjatë ceremonisë së hapjes së themeleve. Tashmë ka filluar puna për ndërtimin, me qëllim për të përfunduar fazën e parë të ndërtimit para dimrit.

Nëntor 2006

Ndihmë për të burgosurit

Shpresë për ata që ndjehen të harruar dhe të përçmuar nga shoqëria. Këtë shpresë ka dashur të përcjellë Kisha Nehemia në Gjirokastër për të burgosurit e burgut të Bencës në Tepelenë. Disa anëtarë të kësaj Kishe në bashkëpunim me Kisha të tjera në Gjirokastër kanë shpërndarë disa pako me sende personale për të burgosurit e këtij burgu, që edhe pse ishin disa gjëra të vogla simbolizojnë përkujdes dhe dashuri. Nehemia planifikon të sjellë shpresë dhe mbështetje për këta njerëz rregullisht për një plan afatgjatë. Për këtë arsye së shpejti janë planifikuar disa kurse gjuhësh të huaja.

Tetor 2006

Donacion për këndin e lojërave në Bucimas

60 çanta dhe 2 makina janë dashur për të transportuar në bankë 177,333 qindarka, që janë grumbulluar nga fëmijët e shkollës "Trinity Oaks Christian Academy" në SHBA (partnere e shkollës Nehemia). Këto para që kanë një vlerë prej rreth 4.500 $, janë mbledhur për të ndihmuar miqtë e tyre të shkollës Nehemia në Shqipëri, për të patur një kënd lojërash. Nëpërmjet këtij akti bamirës këta fëmijë kanë treguar zemërgjerësinë e tyre dhe gatishmërinë për të ndihmuar njerëzit në nevojë. Fëmijët e shkollës Nehemia janë shumë mirënjohës për këtë ndihmë dhe falenderojnë përzemërsisht të gjithë fëmijët që morrën pjesë në këtë fushatë.

Shtator 2006

Mbështetje

Shkollat publike kanë akoma shumë nevojë për mbështetje, sidomos në fshatrat e thella malore, ku shpesh kushtet për zhvillimin e mësimit janë shumë të vështira. Fondacioni Nehemia i ndihmon ato rregullisht nëpërmjet pajisjeve të ndryshme si banka, karrige etj. Pikërisht javën e kaluar është organizuar nga organizata jonë partnere CHW, një transport me pajisje shkollore të përdorura nga Gjermania. Një pjesë e mirë e këtyre pajisjeve do të shkojnë për shkollat publike në fshatrat e thella malore në zonën e Mokrës (Pogradec).

Shtator 2006

Konferenca e Fondacionit Nehemia

Këtë javë është zhvilluar konferenca vjetore e bashkëpunëtorëve të Fondacionit Nehemia. Si folës të konferencës kemi pasur privilegjin të kemi Dipl.Ing. Karl Schock, i cili ka dhënë këshilla shumë të vlefshme mbi punën në skuadër, komunikimin, zgjidhjen e konflikteve, etj. Gjithashtu ai ka drejtuar edhe një seminar 4 ditor me temë: "Drejtimi sipas shembullit apostolik", në të cilin kanë marrë pjesë drejtuesit e projekteve dhe partnerët e Fondacionit Nehemia

Gusht 2005

Bashkëpunëtorë të rinj

Nehemia mirëpret bashkëpunëtorë të rinj në Buçimas. Henryk dhe Ira Hauptmann nga Gjermania, me tre fëmijët e tyre, do të qëndrojnë në Shqipëri për një periudhë 9 mujore. Ata do të ndihmojnë në fusha të ndryshme: Ira është fizioterapiste dhe do të punojë pranë organizatës sonë partnere MNA, kurse Henryk, me shumë përvojë në fushën e informatikës, do të japë kontributin e tij për mësimin e kompjuterit në Shkollën Nehemia.

Gusht 2006

Vizitë e ambasadorëve

Në 4 gusht, kemi pasur një vizitë në Buçimas nga Ambasadori gjerman dhe ai zvicerian, si dhe zyrtarë të tjerë të lartë. Qëllimi i kësaj vizite ishte prezantimi i punës së Fondacionit NEHEMIA. Fokusi kryesor i prezantimit ishte projekti i arsimit, duke filluar që nga kopshti dhe deri tek Universiteti NEHEMIA, që është planifikuar në të ardhmen.

Korrik 2006

I pastrehë

Misto ka jetuar deri tani në një ish banjo publike. Kjo, deri sa erdhi urdhri për të liruar ambientin dhe ai mbeti në rrugë. Meqë prej vitesh vinte rregullisht në mensën tonë për fëmijët dhe të rriturit e rrugës, dhe tani kishte mbetur në mes të katër rrugëve, ne u munduam ta strehojmë përkohësisht në ambientet tona. Bashkëpunëtoret e punës sociale e vizitojnë rregullisht dhe e ndihmojnë në nevojat praktike të jetës së përditshme. Nëpërmjet shërbimit tonë mjekësor, kemi mundësinë t’i ofrojmë Mistos edhe asistencë mjekësore.

Korrik 2006

Kampet verore

Shkolla Nehemia nuk është me pushime gjatë stinës të verës. Ndërtesa funksionale është e zënë  për kampe verore, konferenca dhe ngjarje të tjera. Ambienti i shkollës Nehemia ju garanton 24 orë në ditë ujë të rrjedhshëm, ujë të ngrohtë që përftohet nga kolektorët e paneleve diellore, furnizim emergjent me energji elektrike, si dhe mensa e pajisur më së miri për një gatim dhe shërbim modern.   

Gjatë muajit korrik shkolla shërben si bazë për Projektin AERO. Qëllimi i tyre është të çojnë Ungjillin në çdo fshat apo zonë të Shqipërisë. Pas 12 vitesh pune të vazhdueshme, qëllimi i tyre duket se po përmbushet, pasi fshatrat në rajonin e Pogradecit janë të vetmet që kanë mbetur pa u vizituar në të gjithë Shqipërinë. Në këtë projekt marrin pjesë rreth 300 njerëz nga e gjithë bota.

Qershor 2006

Përfundimi i shkollës

Edhe ky vit shkollor ka mbaruar me sukses. Nxënësit e shkollës private Nehemia, kanë arritur rezultate të shkëlqyera në proçesin mësimor. Shumë prej tyre  janë nderuar me çmime të para dhe inkurajuese në olimpiadat e zhvilluara në rang kombëtar dhe ndërkombëtar.

Në olimpiadën kombëtare të matematikës, të organizuar nga Ministria e Arsimit, Shkolla Nehemia u cilësua si një nga tre shkollat më të mira në shkallë republike.

Shkurt 2006

1000 për Arsimin

Arsimi është shumë i rëndësishëm – veçanërisht në vendet me zhvillim të shpejtë si Shqipëria. Për t’i dhënë mundësi shkollës Nehemia në Buçimas, për t’u rritur më tej, nevojitet një ndërtesë tjetër. Prandaj na duhen 1.000 x 1.000: Do të thotë, një mijë donatorë që dhurojnë nga 1000 €, $, ose 100.000 Lek secili. A dëshironi të kontribuoni? Bashkohuni me ne dhe vendi në tabelën e “1000 emrave” është i sigurt!

Klikoni këtu për të hapur broshurën, për informacione të mëtejshme.

Janar 2006

Terapi

Fëmijë të vegjël me probleme fizike, mendore ose emocionale, ndihmohen në qendrën Nehemia Pogradec. Në një dhomë të pajisur posaçërisht për këtë, ata marrin lloje të ndryshme terapish, të cilat ndihmojnë si fëmijët ashtu edhe prindërit e tyre për t’u përballur me vështirësitë e kufizimeve të fëmijëve të tyre. Deri tani ka shumë pak vende në Pogradec, ku fëmijët me aftësi të kufizuara marrin një mbështetje cilësore. Më mirënjohësit janë pacientët tanë të vegjël dhe familjet e tyre për ndihmën e pedagoges sonë sociale nga Gjermania, Kerstin Seiffert dhe bashkëpunëtoreve të saj.

Nëntor 2005

Nehemia në televizionin gjerman

Një skuadër nga ZDF, një nga stacionet televizive më të mëdha gjermane, ka vizituar Nehemian në Pogradec. Ata kanë përgatitur një seri prej 5 reportazhesh të shkurtra mbi projektet e Fondacionit Nehemia si: puna sociale, zhvillim komuniteti dhe ndihma humanitare. Sigurisht që kjo do të shërbejë si një depërtim interesant në jetën shqiptare.

Qershor 2005

Siguria në rrugë

Trafiku rrugor në Shqipëri është akoma një aventurë. Rregullat dhe ligjet përputhen me standartet europiane, por shpesh ato nuk zbatohen. Ndërmjet të tjerave një nga problemet është mungesa e edukimit dhe trajnimit në këtë fushë.

Shkolla Nehemia, në bashkëpunim me PAMECA-n dhe policinë lokale, po organizon trajnime për sigurinë rrugore, ku nxënësit tanë me shumë entuziazëm dhe dëshirë, mësojnë rregullat kryesore të qarkullimit rrugor.

Shkurt 2005

Stuhi dëbore

Komiteti lokal i krizave ka kërkuar ndihmë urgjente: Disa fshatra të thella malore janë pothuajse të mbuluara me borë, të gjitha rrugët janë bllokuar. Rreth 200 familje që jetojnë atje, kanë nevojë urgjente për ushqime. Menjëherë ne kemi blerë sasi të mëdha ushqimesh – miell, sheqer, makarona dhe oriz. Megjithë rrugën e rrezikshme dhe dëborën që binte pa pushim, kamioni ynë ka transportuar ushqimet deri në fshatin e fundit ku mund të hynte makina. Bishnica është gjithashtu qendra e organizatës sonë partnere CHW, kështu bashkëpunëtorët e saj dhe anëtarët e kishës kanë organizuar shpërndarjen. Familjet duhet të vinin të mernin vetë ushqimet me kuaj ose mushka, duke ecur me orë të tëra nëpër dëborë, pasi nuk kishte mundësi tjetër transporti. Ne jemi akoma duke kërkuar donacione dhe fonde për këtë aksion të papritur. Nëse kushtet klimaterike nuk përmirësohen së shpejti, do të ketë nevojë për transporte të tjera.

Janar 2005

Bashkëpunim

Fondacioni Nehemia dhe Global Business Assist (GBA) kanë rënë dakord për të hyrë në një marrëveshje pune të përbashkët. GBA do të na ndihmojë për të bërë të njohura nevojat në Shqipëri, së pari në SHBA dhe në vendet anglisht folëse dhe do të na ndihmojë për të siguruar donacione për projektet tona të përbashkëta. Për informacione të mëtejshme vizitoni: www.gba.org

Nëntor 2004

Partnerë të rinj

Fondacionit Nehemia i është shtuar edhe një organizatë tjetër partnere: „Misioni i Kryqit“. Në 1 tetor 2004, kjo organizatë është themeluar zyrtarisht në Weilheim/Gjermani. Në bashkëpunim të ngushtë me Nehemian, Misioni i Kryqit drejton projektin për zhvillimin e komunitetit në fshatin Peshkëpi. Këtu përfshihen projekte ndërtimi, seminare e kualifikime, projekte për heqjen e mbeturinave, shërbim përkujdesjeje në familje, takime fëmijësh, etj.

Tetor 2004

Një skuadër për Shqipërinë e veriut

Nehemia do të hapë një degë të re në veri të Shqipërisë. Bashkëpunëtorët tanë Annerose Nistel dhe Michael e Claudia Hanisch me djalin e tyre të vogël, po udhëtojnë nëpër zonat e largëta veriore, ku ekzistojnë shumë pak kisha dhe nuk ka pothuajse asnjë misionar. Ata janë duke kërkuar një vend të përshtatshëm për të punuar e banuar dhe shpresojnë të transferohen atje sa më shpejt.

Shtator 2004

Dita e parë e shkollës

Të hënën ka filluar viti shkollor për më shumë se 320 nxënës të shkollës Nehemia në Buçimas/Pogradec. Çatia, që ishte dëmtuar dy javë më parë nga zjarri, është riparuar; vetëm izolimet e paneleve diellore për sistemin e ngrohjes, nuk janë përfunduar ende. Veçanërisht entuziastë janë nxënësit e vitit të 9, pasi Nehemia ka marrë liçencën për shkollën e mesme, duke iu mundësuar atyre vazhdimin e studimeve për një perspektivë të suksesshme.

Shtator 2004

Zjarr

Shkolla e re Nehemia u përball pothuajse me një katastrofë. Për shkak të një aksidenti gjatë punës së mirëmbajtjes, çatia ka marrë flakë, duke shkatërruar izolimet dhe panelet diellore. Megjithatë, mjetet e mira parandaluese, bashkëpunëtorët e trajnuar dhe ndërtimi i mirë i çatisë penguan përhapjen e zjarrit. Çatia e qëndrueshme parandalonte dëmet edhe nga klasa që ishte direkt poshtë saj, kështu shkolla do të fillojë siç ishte planifikuar, në 20 shtator. Riparimi komplet i çatisë dhe paneleve diellore do të kushtojë rreth 40.000 €. Për këtë do të na nevojitet mbështetja e donatorëve.

Qershor 2004

Festë e madhe në Gjirokastër

Kemi pasur dy arsye të mëdha për të festuar: 10-vjetorin e kishës Nehemia në Gjirokastër dhe inaugurimin e qendrës Nehemia. Ndërtesa e vjetër karakteristike është rinovuar me një kujdes të veçantë. Shumë miq dhe të ftuar nderi kanë ardhur për të festuar me ne. Gjatë shërbesës të së dielës, anëtarë të rinj të kishës janë pagazuar. Së shpejti ne shpresojmë të fillojmë ndërtimin e një ndërtese tjetër për kishën dhe punën sociale për të krijuar kushte më të mira, për kishën që është vazhdimisht në rritje dhe projektet e punës sociale.

Qershor 2004

Kurs i ri për ndihmës infermiere

Javën e kaluar filloi shkolla për gjashtë gra shqiptare, të cilat po trajnohen si ndihmës infermiere sipas standarteve gjermane. Majin e kaluar një grup prej 3 grash mbaruan kursin e parë dhe aktualisht punojnë në shërbimin e përkujdesjes të Fondacionit Nehemia, shërbim ky gjithmonë e në rritje në shoqërinë shqiptare. Këto kurse drejtohen nga organizata partnere e Fondacionit Nehemia “MNA”, dhe mbështeten financiarisht nga organizata gjermane "Diakonisches Werk".

Qershor 2004

Fitues

Lazaron Gusho, nxënës i shkollës Nehemia, ka provuar dijet e tij publikisht. Ai ka fituar vendin e dytë në një konkurs kombëtar me 144 nxënës, më të mirët e 36 qyteteve. Pyetjet kanë qenë kryesisht nga shkencat natyrore dhe shumë prej tyre shkonin përtej programit mësimor shqiptar. Përpjekjet e shkollës Nehemia për të inkurajurar mënyra mendimi të pavarura dhe ndërtuese, po fillojnë të japin fryt.

Maj 2004

Një ditë mjedisi e suksesshme

Ministri shqiptar i mjedisit, Z. Et’hem Ruka, ishte ftuar në qendrën e re Nehemia në Buçimas me rastin e ditës së mjedisit. Në këtë eveniment morën pjesë shumë personalitete në fushën e politikës dhe persona të tjerë publikë, midis të cilëve tre ministra dhe zv/ambasadori gjerman në Shqipëri. Mesazhi i fjalimeve dhe prezantimeve të ndryshme ishte i qartë: Shqipëria ka nevojë për mënyra alternative të furnizimit me energji. Një nga mënyrat për të zbatuar teknikat moderne është për shembull përdorimi i energjisë diellore, i cili është demonstruar në ndërtesat e reja të qendrës Nehemia në Buçimas.

Mars 2004

Vepër arti në kishë

Salla e madhe e kishës së re në Buçimas është zbukuruar nga një vepër arti gjigante, e pikturuar nga artisti i qytetit “TASO”. Piktura në mur (2,5 x 6 m) ilustron historinë e krishtërimit në Shqipëri, duke filluar nga udhëtimet e apostullit Pal, në Ilirinë e hershme deri në kishën e krishterë shqiptare sot. Pogradeci është i njohur tradicionalisht si “qyteti i artistëve”, piktura përmban ngjyra tipike të artistit bashkëkohor të zonës.

Shkurt 2004

Përkujtim

Të enjten, 26 shkurt 2004, kemi organizuar një ceremoni të vogël përkujtimore për mikun dhe bashkëpunëtorin tonë Horst Koschmieder. Në këtë ceremoni, ndërtesa e re e shkollës, e cila ishte planifikuar dhe ndërtuar prej tij, mori emrin e tij. Shumë personalitete publikë, midis të cilëve edhe ambasadori gjerman, morën pjesë në ceremoni, ku shpresa dukej sikur ndriçonte vajtimin. Duke parë në jetën e Horstit, ishte e qartë se ai ishte një njeri që jetoi në prezencën e Perëndisë dhe që gjeti përmbushjen e jetës dhe shërbesës së tij në Shqipëri.